Fasteignafélagið Þórkatla hóf síðla árs 2024 að bjóða fyrrum eigendum fasteigna í Grindavík aðgengi að eignum sem þeir höfðu selt félaginu með gerð hollvinasamnings. Vorið 2025 hóf félagið að bjóða hollvinum að gera viðauka við samninginn sem heimilaði gistingu í eignunum tímabundið. Heimild til gistingar hefur nú verið framlengd í nokkur skipti, nú síðast til 31. ágúst 2026.

Síðustu vikur hefur Þórkatla unnið að endurskoðun hollvinasamningsins með það að markmiði að skýra nánar heimild hollvina til dvalar í eignum félagsins. Í uppfærðum samningi, sem verður í boði frá og með 1. september 2026, verða áfram skýr ákvæði um bann við fastri búsetu og verður heimild til gistingar í eignum félagsins afmörkuð með skýrari hætti.

Til þess að efla öryggi og yfirsýn við rýmingu eignanna verður sett upp skráningargátt á heimasíðu Þórkötlu þar sem hollvinir skulu merkja við hvaða nætur þeir gista í húsum félagsins. Samhliða mun Þórkatla, í samráði við slökkvilið Grindavíkur, auka öryggis- og eldvarnareftirlit eigna félagsins sem svar við þeim kröfum sem gerðar eru á félagið í tengslum við dvöl hollvina í þeim.

Þórkatla stefnir enn að því að bjóða fyrrum eigendum upp á að kaupa eignir sínar til baka með sérstökum endurkaupasamningi Þórkötlu. Vinna við samninginn og lagaumhverfi hans er enn í vinnslu. Helstu þættir endurkaupasamnings Þórkötlu eru að tryggja forgang Grindvíkinga að fyrri eignum sínum ásamt því að tryggja fjármögnun kaupanna og skilarétt í tiltekinn tíma.