Endurkaupaáætlun

Fasteignafélagið Þórkatla býður nú fyrri eigendum fasteigna í Grindavík möguleika á að kaupa eignir sínar til baka af félaginu með svokölluðum endurkaupasamningi. Auk fyrrum eigenda nær endurkaupaáætlun til allra sem höfðu skráð lögheimili innan þéttbýlismarka Grindavíkurbæjar hinn 10. nóvember 2023 og höfðu náð 18 ára aldri við það tímamark.

Kaupverð eignar er það sama og félagið keypti eignina á (sama krónutala) og áhætta kaupenda er afmörkuð þar sem heimilt er að skila eigninni hvenær sem er á gildistíma endurkaupasamnings. ‌Gildistími endurkaupasamnings er til 31. janúar 2030.

Áætlunin er sett fram sem valkostur fyrir þá íbúa sem tilbúnir eru að flytja aftur til Grindavíkur og er í raun mikilvæg forsenda fyrir endurreisn Grindavíkur. Við gerð áætlunarinnar var lögð áhersla á gott samtal við fulltrúa íbúa um lykilþætti og útfærslu áætlunarinnar. ‌

Fyrri eigendum eru boðin endurkaup óháð því hvort að viðkomandi hafi óskað eftir forgangsrétti eða ekki. Hver aðili eða hjón geta þó einungis keypt eina eign skv. endurkaupaáætlun Þórkötlu.

Greiðslukjör endurkaupasamnings

Kaupsamningsgreiðsla er greidd við undirritun endurkaupasamnings og skal að lágmarki vera 5% af kaupverði eignar. Mögulegt er að skipta kaupsamningsgeiðslu á árinu 2027 í tvennt, þá er 2% af kaupverði eignar greitt við undirritun og 3% greitt eigi síðar en 3. janúar 2028.

Kaupandi greiðir mánaðarlegar greiðslur til Þórkötlu á gildistíma samnings. Mánaðarlegar greiðslur taka mið af eftirstöðvum kaupverðs hverju sinni og eru þær 5% af eftirstöðvum kaupverðs. Á árinu 2027 eru greiðslur lægri eða 4% af eftirstöðvum kaupverðs.

Mánaðarlegar greiðslur til Þórkötlu hefjast fjórum mánuðum eftir að afhending eignar hefur farið fram. Einnig hefur kaupandi kost á að greiða inn á samninginn hvenær sem er á samningstímanum og lækka þannig eftirstöðvar kaupverðs og mánaðarlegar greiðslur. Kaupandi skal greiða eftirstöðvar kaupverðs eigi síðar en 31. janúar 2030.​​‍

‌‍

Mánaðarleg afborgun til eignamyndunar

​​‍Ákveði kaupandi við lok eða á gildistíma endurkaupsamnings Þórkötlu að ljúka kaupum á eigninni og greiða eftirstöðvar kaupverðs hennar, verður litið á hluta af mánaðarlegum greiðslum sem afborgun inn á kaupverð eignarinnar.

Mánaðarlega afborgunin til eignamyndunar reiknast sem 1% af upphaflegum eftirstöðvum kaupverðs út árið 2027 og 2% frá og með 1. janúar 2028 og út samningstímann. Afborgunin telst til eignamyndunar og lækkar eftirstöðvar kaupverðs í hverjum mánuði.‌

‌

Reynslutími og skilaréttur

Hvenær sem er á gildistíma endurkaupasamningsins stendur kaupanda til boða að hætta við kaupin og skila eigninni til Þórkötlu án sérstakrar ástæðu. Við skil á eigninni er úttekt vegna skilaréttar borin saman við ástand eignarinnar þegar henni er skilað. Krafa er gerð um að eignin sé í sambærilegu ástandi við skil og hún var í við afhendingu.

Uppfylli eignin kröfur til ástands er kaupsamningsgreiðsla endurgreidd kaupanda vaxtalaust. Sé eignin í lakara ástandi skal viðgerðarþörf metin og andvirði hennar dregið frá upphæð kaupsamningsgreiðslu sem kaupanda er endurgreidd. Ekki er greitt sérstaklega vegna viðbóta eða endurbóta á eigninni.​ Hafi kaupandi greitt aukalega inn á kaupsamninginn umfram kaupsamningsgreiðslu verður sú viðbótargreiðsla endurgreidd vaxtalaust þegar eigninni er skilað. Við skil á eigninni teljast mánaðarlegar greiðslur sem leiga.‌

Kaupa aðra eign en mína fyrri

Þeim sem hafa hug á því að snúa aftur til Grindavíkur en sjá ekki fyrir sér að kaupa sína fyrri eign mun standa til boða að kaupa aðra eign í eigu Þórkötlu. Um 30 eignir í eigu Þórkötlu hafa orðið fyrir altjóni og munu eigendur þeirra ekki geta snúið til baka í sína fyrri eign. Þá hefur einhver fjöldi hug á að skipta um eign vegna breyttra aðstæðna eða þarfa. Með breytingu á lögum munu einnig þeir sem höfðu lögheimili í Grindavík 10. nóvember 2023 og voru orðnir 18 ára við það tímamark hafa tækifæri á að kaupa eign af Þórkötlu. Við val á kaupendum er gert ráð fyrir ákveðinni forgangsröð:

• Forgangur innan fjölskyldu. Þeir sem eru skyldir fyrri eiganda í beinan legg hafa forgang við sölu eignarinnar.

• Þeir sem áttu eign í Grindavík sem varð fyrir altjóni eða Þórkatla telur að fyrri eign þeirra sér ekki í söluhæfu ástandi.

• Ef tveir eða fleiri óska eftir að kaupa sömu eign verður dregið um hver fær að kaupa eignina.

Á árinu 2027 verður þeim sem ákveðið hafa að kaupa sína fyrri eign heimilt að skila þeirri eign, kaupa aðra eign af Þórkötlu og færa yfir áunnin réttindi skv. endurkaupasamningi. Með þessari ráðstöfun er einstaklingum veitt svigrúm til að finna sér aðra eign á meðan þeir búa í sinni fyrri eign á árinu 2027.

Stefnt er að því að opna fyrir kaup annarra en fyrri eigenda á eignum í apríl 2027. Kaup annarra á eignum er þó háð því að einhver fjöldi fyrri eigenda sem ætla sér ekki að snúa aftur til Grindavíkur hafi afsalað sér forgangi á sinni fyrri eign.

‌

Frátekin eign

Þeim einstaklingum sem seldu Þórkötlu fasteign sína stendur til boða að gera samning um að taka frá sína fyrri eign til 31. desember 2027. Frátekin eign er hugsuð til að veita þeim sem kjósa að bíða með flutning til Grindavíkur svigrúm á árinu 2027.

Tveir valkostir eru í boði fyrir frátekna eign:

• Án afnota af eigninni og án þátttöku í rekstrarkostnaði hennar.

• Með heimild til afnota af eigninni með yfirtöku á greiðslu á hita og rafmagni.

Heimilt er að geyma hluti í fráteknum eignum með afnotarétti, en ekki er gert ráð fyrir heilum búslóðum. Óheimilt er að gista í fráteknum eignum.​‌