Hollvinir Þórkötlu hafa í sumar haft tækifæri til að gista í fyrrum eignum sínum í Grindavík. Í byrjun september höfðu 74 hollvinir undirritað viðauka við hollvinasamning sem heimilar gistingu í eignum Þórkötlu. Stærstur hluti þeirra undirritaði samning í maí og júní sl.

Um var að ræða tímabundið verkefni til reynslu í sumar og var markmiðið að ýta undir að Grindvíkingar haldi tengslum við bæinn. Heimildin var hugsuð til sumardvalar en ekki til fastrar búsetu. Reynslan af verkefninu hefur heilt yfir verið góð og vill starfsfólk Þórkötlu koma á framfæri þakklæti til þeirra hollvina sem varið hafa tíma í Grindavík í sumar, hlúað að fyrrum eignum sínum og görðum.

Á næstu dögum munu hollvinir Þórkötlu fá senda stutta könnun um nýtingu á hollvinasamningi og viðauka um gistingu. Markmið könnunarinnar er að öðlast frekari skilning á viðveru í Grindavík og getu hollvina til að bregðast við, komi til rýmingar.

Viðauki við hollvinasamning um gistingu rennur út þann 30. september nk. en í ljósi þess hve vel verkefnið hefur gengið verður því haldið áfram. Áfram geta þeir hollvinir sem ekki hafa sótt um viðauka um gistingu sótt um slíka heimild á heimasíðu félagsins.

Þeir hollvinir sem í gildi hafa viðauka um gistingu munu fá tölvupóst á næstu dögum þar sem undirrita þarf framlengingu á gistiheimild. Ekki verður innheimt umsýslugjald vegna framlengingarinnar.

Óski hollvinur eftir því að hætta með hollvina- eða gistisamning eru þeir beðnir að senda tölvupóst þess efnis á netfangið hollvinir@torkatla.is

Athugið: Landris og kvikusöfnun hefur haldið áfram undir Svartsengi og hefur hraði söfnunarinnar verið stöðugur undanfarið. Mælingar Veðurstofu Íslands gefa ákveðna vísbendingu um hvenær líkur á næsta atburði aukast. Miðað við stöðuna í dag og þrátt fyrir óvissu í þessum efnum má ætla að atburður geti hafist í lok september. Vöktun og viðbragðsáætlanir miða þó við að eldgos gæti hafist hvenær sem er. Reikna þarf með að fyrirvari á eldgosi verði stuttur líkt og í fyrri atburðum en þá hefur fyrirvarinn verið frá 20 mínútum og upp í rúma 4 tíma.